معاناة ناذل مقهى في زمن الكورونا .

انا كنت خدام ناذل مقهى ودابا واقف من الخدمة و الله ما استفدنا من شي دعم ، ما عندنا ضمان إجتماعي ما عندنا وراق فهاد الضومين .، اغلبية أرباب المقاهي مكا يديروش الوراق للخدامة ديالهم ، ، رغم ان فيهم ، ناس من الطبقة البرجوازية ، و نخبة برلمانية ، و باطرونا مثقفين ، و كاينين المكلخين لي داخلين الضومين بالشكارة ، إلا ان المتضرر الكبير في عمال المقهى ، هو السرباي ، و البرمان ، و خادمات الميناج ، الصالير ديالنا كسرباية ف السيمانة 300 درهم حتى 350 درهم ، كنعيشو فقط مع الكليان من التدويرة ديالهم …و الگارو إلى كان محرك كيعاون …لكن كاينين شي كليان الله يهديهم يخليوك حتى تكون ملهي وٍي يْسْلْتْو ليك …و تلقى بنادم تقتي فيه حطيتي ليه قهوة ديالو و عطيتيه 5 مالبورو و لا خمسة وينسطون …و ف التالي يسلت ليك ، عشرين درهم مشات 👎 ما كا يقدروش الظروف هاد السلايتية ما عرفينش بلي راك غادي تخلصهم من جيبك …اما إلى سلتو لينا شي 4 ولا 5 كليان ، صافي هناك كتكون الصدمة ، إلى ما كانش عندك فلوسك تحت منك ، باش تكمل الروسيطة ديال مول القهوة ، كيردك شفار ، و ما يعقلش عليك .. ، هادشي كيخلينا اننا نبعدو على هاد الخدمة و نمشيو نديرو شي كروصة ديال الخضرة ، ولا شي حاجة اخرى ، كنلقاو صعوبات ثاني مع الحملة ديال المخزن علينا ، ( كنهدر على راسي ) .. كنعاود نرجع لهاد الخدمة ، حيث كنبغيها و ربما تقدر تلقى شي قهوة ، لي الكليان ديالها الله يعمرها دار ، و ف المستوى ، حيث هاد الخديمة ديالنا كسبنا فيها محبة الناس ، و درنا فيها اصدقاء ، و ربما لقينا فيها خوتنا الحاصول …الله يهدي الجميع.

#المهم… اخوتي و الله حتى خوكم متضرر ، كاري فكازا حاصلين معايا جوج خوت صغار …حنا من مدينة الراشدية …رمضان دوزناه بالفقصة …ما استفدنا من حتى شي دعم ، و الله كون ما بعض الإخوة لي تعاونو معنا كون راه شي واحد فينا نتاحر 👤👥 شكينا ما كاينش لي يسمع لينا ، واش حنا ماشي مواطنين 😔 واش حنا ماشي مغاربة 😔 لي مدوز حياة تزوفريت هو لي غادي يحس بكلامي ….حيث ما لقينا ما نصرفو ..و الله العظيم حتى تقهرنا و عيينا و ملينا او ولينا معصبين كثر من القياس …بغينا هيل يحيدو هاد الحجر الصحي نقلبو على خدمة …و داك الدعم خليناه ليهم الله ياخد الحق ….

#السلايتية ديال القهاوي حنا دابا محتاجينكم وقفو معانا و صفيو دمتكم الله يجازيكم بخير …

#الخوت المحسنين شوفو من حال عمال المقاهي ، و من كل هو محتاج للمساعدة ، و ما قدرش يقولها ، عاونونا راحنا تقهرنا مع هاد الحكومة ما لقينا فيها خير ، و نتما يا المحسنين هو الخير لي بقى لينا من بعد الله سبحانه .

التعليقات مغلقة.