تنجري كيضرني جنبي معرفتش علاش؟
عثمان الدعكاري
مع الأستاذ والإختصاصي في الgياقة البدنية “عزيز الموالي” .
جريدة أصوات : سي عزيز مرحبا بيك عند مشاهدي وقراء جريدة أصوات
عزيز الموالي : مرحبا أخي “عثمان الدعكاري” و رحبا لمتابعي جريدة أصوات المحترمين داخل أرض الوطن وخارجه ولية الشرف نكون معاكم .
جريدة اصوات : سي عزيز صحة لا تشترى بالمال، كينين بعض الناس ليتهتم بصحة واللياقة البدنية ديالهم.
ولكن بنسبة المبتدئين لما تاتجري أول مرة كيضرك جنبك واش هاد الحالة طبيعية؟
عزيز الموالي : أولاً لما كتبقا “سي الدعكاري” تجري لمسافة طويلة، واحد الشوية كتشدك بحال نخصة فجنبك، و ما كتقدرش باقي تكمل الجرى، هاد الصداع لي كتحس بيه طبيا كيتسمى “سايد كرامب”، غالبا كيوقع فالجنب الليمن من الكرش، و السبب هو أنك فاش كتدير واحد المجهود بدني الأوكسجين كينقص، و هنا الطحال والكبدة مكيبقاوش يرسلو الكريات الحمرا اللي كتهز الأوكسجين، و هادشي علاش كتحس بالنخصة، و كيف تحبس الجرى الصداع كيحبس.
جريدة أصوات: واش المسألة خطيرة؟
عزيز الموالي : لا لا ماعندكش مناش تخاف حيت هاد الصداع لي كيجيك طبيعي، و مكيعنيش أنك مريض بشي مرض خايب.
جريدة اصوات : عرفنا أشناهو هاد “سايد كرامب”، دابا بقا السؤال كيفاش ما يبقاش يجيني أصلا؟
عزيز الموالي: أولا شرب الما بزاف، و ما عمرك تجري وأنت فيك العطش، حيت هاد الصداع لي كتحس بيه كيوقع حيت الجسم ديالك ناشف من الما، و بدا تجري غير بشوية يعني دير تسخينات، ومع الوقت زيد سرعة الجري تدريجيا، ما تنساش تبقا تتنفس مزيان شهيق زفير، و قلل من الماكلة قبل ما تجري.
جريدةأصوات : سي عزيز وعتيني أنك غتعطي نصائح للسيدات تمارين منزلية سهلة لتخفيف ألم الظهر إن شاء الله ،أستاذ عزيز الموالي الإختصاصي في اللياقة البدنية كنت مع جريدة أصوات شكرا لك
عزيز الموالي: شكرا لك أخي عثمان الدعكاري على للإستضافة ونا رهن الإشارة.
جريدةأصوات: متتبعي جريدة أصوات معكم عثمان الدعكاري اتمنى من الله انكم تكونوا استفدتم و نحاول نهتم بصحة ديالي لأن صحتي كعما تاتعوض، تحياتي ليكم.
وكونوا دائماً قراب مع جريدة أصوات السلام عليكم .
موعدنا يوم الخميس المقبل إن كان في العمر بقية.
التعليقات مغلقة.