سري جدا جدا جدا .. حكايتي مع بوبكر الجامعي واسبوعية لوجورنال

واحد الاخ صحفي اصلو مغربي مزداد فبلجيكا ارسل لي فيديو ديال الجامعي فقضية مجلة لوجورنال اللي كيتهم فيها احد خبراء الامم المتحدة ومدير المركز الاوروبي للدراسات الاستراتيجية والامن .. كان فالمخابرات dgse ديال فرنسا وفنفس الوقت صحفي في مجلة ليكسبريس اقبل ما استقر في بلجيكا .. كيتهمو بوبكر الجامعي بانه هو اللي سد ليهم اسبوعية لوجورنال ..القضية دازت فالمحكمة وكان المحامي ديالو زيان ..هاذ الاخ الصحفي كان نظم محاضرات لبزاف المعارضين المغاربة من احمد بناني للصحفيين على لمرابط وبوبكر الجامعي للاخوان بوريكات وكذلك صحفيين فرنسيين مختصين في قضية بن بركة او سنوات الرصاص ومن بينهم جيل بيرو صاحب كتاب صديقنا الملك ..كينظم اللقاءات غير مبادرة منو لان باه كان معارض ديال الحسن الثاني هاجر لبلجيكا ..وكان هاذ الصديق ديما كيجي اسولني على تفاصيل قضايا وقعات فسنوات الرصاص وحتى فالعهد الجديد او استفسار عن صور الخ .. اخيرا عاود ارسل لي الفيديو القديم بمناسبة تقدم خبير الامم المتحدة اللي هو كذلك معايا فالفاسبوك للانتخابات فبلجيكا ..

المشكل انني كانت عندي علاقة سابقة مع بوبكر الجامعي ف 2002 اقتارح علي نخدم معاه ككاريكاتوريست ولكن ما عجبنيش ميدان الكاريكاتور وفضلت الفن التشكيلي ونبقى فاكادير ..ولكن فنفس الوقت ومن بعد حوار معاه اكتبت ليه رسالة مطولة كنشرح ليه فيها كلشي التغييرات اللي خاصو ايديرها فالجورنال ..وفعلا اتبع النصائح ديالي وغير الخط التحريري وشكل المجلة والمحتويات ديالها ونجحات ..ولكن بوبكر الجامعي ما عمرو اتفكرني وخلصني على الخدمة ديالي …واحدفني من الفاسبوك من وراء 2011 ربما باش ما نجبدش ليه ديك القصة ..

خلال 2003 الذكتور عبد الصمد محي الدين من باريس اقتارح مخطط للتنمية البشرية لبعض المقربين من الملك وبقا كيتداول فالكواليس الى حدود جوان 2005 حين اعلن الملك في خطاب عن المبادرة الوطنية للتنمية البشرية ..
مباشرة من بعد الصيف اللي كيكون فين عمل كثير كناخد العطلة ديالي ابتداء من 1 ستنبر من كل سنة وكنسافر ف 2005 قررت نكتب تقرير عن تاريخ الفن التشكيلي منذ الاستقلال في المغرب درت التحقيق ديالي وفي اخر الشهر انجزت التقرير ورسلتو للديوان الملكي ..خلال شهر نوفمبر غادي اكتب الخبير كلود مونيكي مدير esisc تقرير عن تاريخ الصحراء مؤرخ ب 6 نونبر 2005 ..في اخر اسبوع من نونبر بوبكر الجامعي غادي احصل على نسخة من ذاك التقرير وغادي انتاقدوا واقول انه مكومنديه المغرب وخلصو للمركز وانشر عليه مقال ..في بداية دجنبر غادي مزيان بلفقيه مستشار الملك اجمع رؤساء الجامعات واساتذة من بينهم بلمختار و رحمة بورقية واخشيشن باش اكتبوا تقارير الخمسينية للتنمية البشرية .. وغادي اكتب التقرير عن الفنون التشكيلية الطنجاوي محمد المطالسي ولكن ما غاديش اقتارح فيه شي حلول عملية بحال اللي درتها فالتقرير ديالي انا اللي كنت فنان محترف ..ما علانا التقرير غادين اقدموه للملك في يناير 2005 
من بعدها مباشرة الخبير الاستراتيجي غادي اتقلق على المقال ديال مجلة لوجورنال وغادي ادعيهم للمحكمة …واعين المحامي زيان انوب عليه … 
المهم سي زيان مول الزبايل اللي كينقز من المقلة كان مدير النهار المغربية وفنفس الوقت محامي الخبير الاممي واطبع التقرير ديال المركز ونشرو فكتيب صغير ..انا غير اقشعتو فالاكشاك فمارس 2006 شريتو وقريتو ..بان لي تقرير عادي ديال خبير فالشؤون الامنية .. وناض بوبكر الجامعي اكتب عليه بانه تقرير خلصوا المغرب باش انحاز ليهم فقضية الصحراء …
ف 2007 اصدر الحكم وحكمات المحكمة على بوبكر الجامعي ب 300 مليون وكان مضطر اغادر لوجورنال باش ما اخلصهاش ..جاء من بعدو على عمار مدير .. المشكل ان الجامعي والمحامين ديالو والخبراء اللي انتادباتهم المحكمة ما قدروش اجيبوا اي حجة على ان التقرير كومنداوه وخلصوه المغاربة يعني منحاز ليهم …
المهم فاش قريت التقرير ف 2005 ما بان لي فيه حتى شي انحياز لاي طرف .. ولكن مباشرة من بعد اعلان المغرب عن اقتراح حل الحكم الذاتي فالصحراء سنة 2007 بديث واحد البحث على خرائط جديدة في موقع الامم المتحدة وكان عندي تحفظ واعتابرت بعضها غلط وما خصهمش انشروها وراسلت الامم المتحدة فاخر 2007 وجاوبوني برسالة من مستشارة بانكي مون كانت حجة عليهم من بعد ان ما اقوله صحيح بالنسبة لخريطة اخرى لم ينتبهوا اليها ..اكتبت ليهم رسالة ثانية والامم المتحدة اضطروا ياخداووا قرار اعتبار تلك الخرائط خاصة بيهم ولا يجوز نشرها واستعمالها بدون اذن ..
ملف صحفي على القضية نشراتو اسبوعية المشعل فجوان 2008 من طرف الصديق رئيس التحرير انذاك ادريس ولد القابلة ما علانا … 
انا فاش عاود قريت التقرير ديال الخبير الاممي على الصحراء لانه فيه معلومات ساعداتني في كتابة رسالتي للامم المتحدة تذكرت واحد الخبر تنشر فالاسبوع الصحفي والسياسي فاخر نوفمبر 2005 كيقول فيه مصطفى العلوي ان بن بلا اول رئيس للجزائر جاء لفندق هيلتون فالرباط باش احظر لعيد الاستقلال الخمسين مع شيراك وزباطيرو وانه فالصباح اهرب ليهم واركب هو وامراتو فطاكسي ومشا لمراكش .. الخبر عادي ما كيعني والو وما امكنش تصيب ليه شي تفسير ..
ولكن فاش عاود قريت التقرير ديال البلجيكي لقيت فيه فواحد الجملة صغيرة عرفت من خلالها علاش اهرب بن بلا واستنتجت ان الخبير كان فراسو اش غادي اوقع ف18 نونبر 2005 واللي ثم التاجيل ديالو لان بن بلا اهرب والمح ليه فالتقرير ولو بجملة صغيرة ولكن كان غلط فادح ….
ف 2011 خلال حوار مع احمد بناني الله ارحمو كان فيه الخبير البلجيكي تكلمت معاه فالبريفي واحكيت ليه كلشي القصة من طاق طاق حتى للسلام عليكم وكيفاش بن بلا اهرب ..استغرب واعرفني افهمت كلشي ..كان كيظن انني كندير ليه الشانطاج وقال لي بشحال كتبيع اللوحات قلت ليه فاش تجي لاكادير نعطيك لوحة فابور من عندي ..
( ولو غير على هداك التقرير ديالو اللي اخدمت بيه وساعدني فالمهمة اللي اقضيت ههه.)
اليوم كيبعث لي الصديق الصحفي من بلجيكا بالفيديو ديال الجامعي من جديد لان الخبير اتقدم فالانتخابات فبلجيكا .. ربما كينتظر مني هاذ المقال بالفرنسية مع التفاصيل ولكن الحجج اللي عندي كتسوى 300 مليون اللي حكموا بها على اسبوعية لوجورنال … قادين اخلصوها ندير بحال هشام المنصوري كانني صحفي مضطهد ونطلب اللجوء السياسي لفرنسا اللي عندي الحق نحصل على الفيزا فيساع لانني عندي احفاد فرنسيين …ونمشي نحكي ليهم كلشي بالخشيبات من طاق طاق حتى للسلام عليكم ..
ولكن المشكل انا ما باغيش 300 مليون باغي التيقار وبوبكر الجامعي فايت ساعدتو واربح مئات الملايين على ظهري وما اعطاني حتى فرنك ….😅😅
بالطبع الخبراء اللي اقراووا هاذ المقال غادين افهموا اش كان غادي اتعلن ف 18 نوفمبر 2005 وتاجل بسبب هروب بن بلا … وامكن ليهم ابحثوا على الجملة فالتقرير ..اللي كنت نشرتو عندي في articles من 2010 .. اقبل ما احدفوه من الانترنيت …
…
علاقة الصورة بالمقال هو انه لو كنت معرب ودرست بالعربية كما تتوخاه هاذ السيدة اللي باغة تبيعنا القرد وتضحك علينا انني ما غاديش ابدا نقدر نفهم اي زفتة فالموضوع اعلاه ولا نراسل الامم المتحدة وانجح فالمهمة اللي قمت بها ..وربما نكون كنشرب بول البعير ونزور سيدي شمهاروش وفرحان وكنفتاخر بالامية والجهل ديالي …!!
وتجي هي من اللور نصبح رئيسة حزب يساري وكتسابق تصبح وزيرة وقارية ففرنسا وتبذا تنصح الشعب باش اقريووا اولادهم العربية بحال علال الفاسي واصيفطوا اولادهم هم اقراووا فالبعثات الاجنبية … ويلي ويلي … …
كنتمنى الاستاذة نبيلة منيب اوصلها هاذ المقال وتقراه وتفهم مزيان انها غالطة وتعتارف بالاغلاط ديالها وبان العربية لا تصلح الا لقرض الشعر لا غير .. ولا يمكن ابدا ان تدرس بها علوم ولكن هذا موضوع اخر ..
انتهى كلام الراوي ..