شوية ديال الثقالة ها العار!

عبد اللطيف اكنوش

لعلاقة المتوثرة بين المغرب والسعودية، مالازمهاش تصبح علاقة عدائية للي تسمح لعباد الله للي كاريين حنكهوم يقولو غا للي كان…المغرب عندو مصالح استراتيجية في الشرق كما في الغرب، وقضية المونديال ماشي “مصلحة استراتيجية” للمغرب، كما أن قضية “برنامج العربية” حول قضية الصحراء ماتستاهلش هاذ التعصب كولو، لأنه على محال هاذيك مؤسسة إعلامية بغض النظر عن علاقتها بديوان بنسلمان…المغرب لازمو Il en prend acte وبلا غوات، ماشي حنا في سوق ديال البصلة!

المغرب غادي مزيان من نهار للي بنى علاقتو مع المشرق بمنطق “رابح/رابح”، أي من نهار طلع سيدي محمد بن الحسن للعرش في 1999، ومن نهار للي رفض أنه يتصرف مع السعودية وغير السعودية بمنطق محمد بنسلمان مع “دونالد ترامب” والشيكات للي كايعطيه باش يحصل على رضاه…في المقابل، بنسلمان لازمو يحتارم سيادة القرارات المغربية، ولازمو يحتارم كرامة القوات المسلحة الملكية للي هي ماشي خدامة عند خالتو، وللي هي مركز الكرامة المغربية و”النفس المغربية” والتربية المغربية “القدييييمة” بزاف، وللي ولاد اليوم نساوها بالمرة!!

في المقابل، المغرب لازمو يحتارم سيادة قرارات السعودية، وبدون تشنج، يعني تضببر لمحاينها، غير تعطيه التيقار…لأنه على العموم، في السياسة الدولية ماكاينش صداقات دائمة، وماكاينش عداءات دائمة، كاين الصواب والديبلوماسية وسددينا…